Veciye Qaşqa

Veciye Qaşqa (1935 oraq ayınıñ 1, Üsküt - 2017 qasım ayınıñ 23, Aqmescit) - Qırımtatar milliy areketiniñ veteranı. Veciye hanım - Mustafa Cemilevnen beraber, Vatanğa qaytuv oğrunda qırımtatar milliy areketiniñ timsallerinden biri.

Veciye Qaşqa
Doğğan künü	1935 İyül 1(1935-07-01)
Doğğan yeri	Üsküt, Aluşta şeer şurası, Qırım Muhtar Şuralar Sotsialist Cumhuriyeti, Rusiye Şuralar Federativ Sotsialist Cumhuriyeti, Şuralar Sotsialist Cumhuriyetleri Birligi
Ölgen künü	2017 noyabr 23(2017-11-23) (82 yaşında)
Ölgen yeri	Aqmescit
Memleketi	Şuralar Sotsialist Cumhuriyetleri Birligi  Ukraina
Zenaatı	toplulıq lideri

Tercimeiyal

1935 senesi oraq ayınıñ 1-inde, Üsküt köyünde doğğan. 1944 senesi on yaşındaki qız olıp bütün qırımtatar halqınen beraber sürgünlikke oğrağan.

Ömür arqadaşı Bekirnen beraber Veciye hanım, 1950 seneleri milliy areketke qoşulğan. Ailesi o vaqıt Özbekistannıñ Orta Çırçıq rayonında yaşay edi. Milliy arekette iştirak etken yılları içinde Veciye Qaşqa, Mustafa Cemilevniñ ve diger qırımtatar erbaplarınıñ safdaşı olıp da, Petro Grıgorenko, Andrey Saharovnen (aynı o, oña evine qaytmağa yardım etken edi) ve başqa sovet dissidentlerinen de bağ tutqan edi.

1969 senesi Qaşqa ailesi (aqayı, beş oğlu ve qızı), Qırımnıñ Qarasuvbazar rayonındaki Cemrik köyüne köçip kele. 1973 senesi aralıq ayında aile, aynı bölgesinde Üçköz köyünde bir ev gizliden satın aldı. Veciye Qaşqanıñ ömür arqadaşı Bekir ağa 2012 senesi keçindi, Veciye hanım özü ise Üçközde yaşay edi.