Qırımtatar yemekleri

Qırımtatar yemekleri — qırımtatarlarnıñ milliy aşlarıdır.

Çiberek

Lülâ kebap

Qırım yarımadası ösümlikler, et, sebze ve meyvalar ile zengindir. Qırımtatar yemekleri çöl ve Aq deñiz medeniyetleri tesirinde şekillendi. Onıñ içün noğay ve yalı boyu aşları pek farqlana. Yalıboylularnıñ sofralarında sıq-sıq sebze, meyva ve balıq ola, çöllüler ise et ve süt mahsulatını aşamağa daa çoq seve. Buña baqmadan, er sofrada umumhalq yemeklerini körmek mümkün.

Tarih

Evel-ezelden qırımtatarlar çöl, dağlar ve Qara deñiz yalısında yaşay edi. Yemekleriniñ temelinde at, qoy, tuvar eti bar edi, amma domuz eti degil. Domuz musulmanlar içün yasaqtır.

Esas yemekler

Şiş kebap — qoy, at ya da müsür etinden kebap.

İmam bayıldı  — qarıştırılğan biber, domates, soğan, sarımsaq, mağdanoz ile toldurılğan patılcan.

Dolma (tolma) — qıymanen toldurılğan biber.

Sarma — yaş yüzum yapraqlarına sarılğan qıyma.

Köbete — içine qoy eti, qartop ve soğan qoyulğan hamır aş.

Çiberek — yarımay şeklinde qaynağan yağda qavurılğan hamır aş, içinde qıyma bar.

Pilâv — ananeviy Qırım pilâvına quru yüzüm qoyula.

Baqla şorbası  — baqladan pişirilgen et şorbası.

Sarburma — ince cayımğa sarılğan et qıyması. Fırında ya da mantı qazanında pişirile. Yalıboylular, qıyma yerine qabaq ve ceviz qoyıp onıñ tatlı soyunı da yapa.

Yantıq (çöl tarafında: cantıq, yalı boyunda: fırın yantıq)  — fırında pişirilgen qayıq şeklinde yapılğan hamır aş, ortasına et qıyması ya da penir qoyula.

Qaşıq aş (qaşıq şorba) , yalı boyunda ufaq aş denile. Aqiqiy aşçınıñ bir qaşıqqa 9 aşı sığmalı.