Thank You
| Дякую | |
|---|---|
| Studiya albomı | |
| Çıqqan künü | 1 oktâbr 2014 s. |
| Janr | soul, elektronik, caz |
| Til | inglizce, ukraince, rusça |
| Devlet |  Ukraina
|
Dâkuyu (qırımca: Teşekkür) – Camalanıñ üçünci CD albomı, daa doğrusı yarımalbomı, çünki o altı yırdan ibaret[1]: "Заплуталась", "My Lover", "Watch over me", "Perfect Man", "Песня о Дружбе", "Thank You" – birer yır ukrain ve rus tilinde, qalğan dörtü ise inglizce.
2014 senesi oktâbrniñ 1-inde Camala internet vastasınen öz SoundCloud saifesinde sabırsızlıqnen beklegen diñleyicilerge bütün albomnı taqdim etti.
Oktâbr 3 künü paytahttaki “Sentrum” klubunda Camalanıñ "Dâkuyu" serlevalı albomınıñ taqdim tedbiri “Aristokratı” radiosınıñ yañı mevsim açılış çerçivesinde ötkerildi. Müsafirler arasında Andriy Hlıvnük (Bumboks frontmeni), İvan Dorn, Alloise, Dmıtro Şurov (Pianoboy frontmeni) bulundı.
Şu albomnı satqanda qazanılğan bütün para ukrain ordusına qoltutmaq içün ketecek (bunı ötkerici Valeriya Çaçibaya "Aristokratı" radiosında albom aqqında Camalanen subetleşkende dedi).[2].
Albom aqqında
deñiştir| “ | "Dâkuyu" yarımalbomımnıñ yırları şimdiki alımnı büs-bütün akis ete bile. Yañı yırlar menim şahsiy ayatımnen ve etrafımızda olğan şeylernen bağlı: sevgi, şübeler, hainlikler, ümütler, minnetdarlıq ve imandır. Bu yırlarnı sanki eñ samimiy mektüplerni er bir insanğa, diñleyicilerime, bütün bizim memleketimizge, dünyağa açıq yürekten yollayım. Bu albom bütün tüşüncelerim, yüregimni toldurğan duyğularım açıqtan-açıq aydınlata[3]. | ” |
öyle sözlernen Camala yañı albomınıñ çıqışını izaat etti.
| “ | "Men yañı yırnı yazmağa başlağanda o "yañı" ne qadar "eskilerge" dair olğanını añlap olamayım. Men icadiy bir adamım, onıñ içün içimde is etkenim yazğan yırlarımda da akis etmege tırışam, soñra diñleyiciler farqlar tapa bile. Menim icün yañı EP evelki de yapqan yaratıcılığımnı mantıqiy bir devamıdır. İfadelikten "yañı Camala" men azçıq tesirlenem. Em añlap olamayım ki, inkişaf etmeyip lâyıq bir yañılıq yazmağa nasıl mümkün. Men tek öz mikrodünyamda qapalıp oturmayım da, umumiy muzıka dunyasında olğan yañılıqlardan haberdar olmaq er vaqıt tırışam, zemaneviy muzıkanen beraber men de inkişaf etmege areket etem, onıñ içün şu yañı albomımda da usul ceetinden deñişüvler eşite bilesiz, elbette. Birinci albomımda vokal partiyası çevirilip tizilüvniñ (aranjirovkanıñ) sanki bir qısmı edi. Ekinci albomımda aktsent asıl metinge qoyuldı ve soul ananeleri devamlandı, amma kimer eserlerde biraz Britaniyanıñ tesir etkeni de duyula. Üçünci albomımda em keyf bam-başqa, em de o umumiy bam-başqa, – o pek britaniyalı – vokal partiyası mında bayağı yüksekçe tura, içerideki duyğularımnı qayd etmekçün.
Men tam manasınen ep postsovet fezasında diñleyicilerge soul muzıkasını aşlamağa tırıştım. Çünki bizim mentalitetimizde "ekinci dolya", "gruv" degen añlamları yoqtır, teessüf ki. Birinci albomnı yazmağa başlağanda, men diñleyicilerge qarşı qolay bir yolunı qıdırmay edim, çünki şu "drı-tı-tı, drı-tı-tı" kibi şeylerge hızmet etmege istemey edim – men Amerika ve Britaniya muzıkasında balalıqtan aşlandım. Amma ilhamnı men er bir yerden çomuçlayım. Yañı EPde Rahmaninov, Meyerber, Bah maña çoq tesir etti – "Zaplutalas" degen yır büs-bütün öyle bir motivlernen tolu[4]. |
” |
Tehnikiy yañılıqlar
deñiştirQayd etmek kerek ki, bu albomnıñ evelkilerden bir esas farqı bar – albom yañı elektron şekilde yañğıray. Daima kibi, albomnıñ çevirip tizicisi (aranjirovşçik) ve ses prodüseri – Yevgen Filatov (The Maneken); istisna olaraq – “Perfect Man” – sesprodüserlik Camala ve Sergiy Yerömenko birlikte yaptılar.
Şu yañı albom elektron şekilde çıqqan soñ, kimerleri Camalanı britaniyalı Ceyms Bleyknen (James Blake) ölçeştirmege başladılar.
Yırlar cedveli
deñiştir- Заплуталась (qırımca: Adaştım) (sözl. Viktoriya Platova/Camala)
- My Lover (qırımca: Oynaşım) (sözl. Art Artonian)
- Watch Over Me (qırımca: Meni baqıp tur) (sözl. Maria Q)
- Perfect Man (qırımca: İdeal bir adam) (sözl. Art Artonian)
- Песня о дружбе (qırımca: Dostluq aqqında yır) (sözl. Viktoriya Platova)
- Thank You (qırımca: Teşekkür) (sözl. Art Artonian)
Menbalar
deñiştir- "Dâkuyu" albomını diñlemek --> SoundCloud
- "Sentrum"daki kontsert (seyir etmek --> YouTube)
Atıflar
deñiştir- ↑ diñlemek --> Soundcloud, satın almaq --> iTunes
- ↑ diñlemek --> by aristocrats.fm
- ↑ Camala öz Facebook saifesinde yanı albomnıñ çıqışını yayınladı
- ↑ Onuka, Монатик и другие молодые украинцы, которые не хуже Ивана Дорна