Tañ sülâlesi (çince 唐, pinyin: táng, 618 kiraz ayınıñ 18 - 907 kiraz ayınıñ 4) - Qıtay tarihında sülâle ve imperatorlığı: Suy sülâlesiniñ halefi; Beş sülâle ve on çarlıq devriniñ selefi. Li Yuan tarafından qurulğan. Sülâleniñ ükümdarlığı, U Dzetân imperatriçesinen Ekinci Cou sülâlesiniñ (690 ekin ayınıñ 16 - 705 saban ayınıñ 3) peyda oluvı ile qısqa müddetine toqtatılğan edi.

Tañ imperatorlığınıñ paytahtı, o vaqıttaki dünyasınıñ eñ büyük urbanistik merkezi Çañan şeeri olğan. Tañ sülâlesiniñ ükümdarlıq devri, muvafaqiyetli basqıncı cenkler ve iqtisadiyatnen medeniyetiniñ şiddetli inkişafına zengin. Tañ devletinden Qıtay tarihındaki “altın devri” başlana.

Ükümet deñiştir

Nazirler kabineti, icraiy vazifelerni altı ananeviy idare ile amelge keçire edi. Olarnıñ eñ esası, orta asırlı cemiyetiniñ bütün yaşayış ceetlerinden ibaret olğan (merasimlerge riayet etüv, tebaalarnıñ ahlâqlı oluvı ve olarnıñ tasili, diniy teşkilâtları) Merasim müdiriyeti (Li bu) olğan edi. Elçihanelerni qabul etüv ve diplomatik munasebetlerni tizüv de Merasim müdiriyetine bağlı edi.