Mantıq (arapça مَنْطِق‎ - manṭiq, "söz aytuv" manasına kelgen n-t-q tamırından; Ğarp tillerinde logika, qadimiy yunanca λογική, "söz", "mana", "fikir" manasına kelgen λόγος sözünden) - qanunlar ve tefekkür çeşitleri, ögrenüv yolları, bilgi ve muakemeniñ kerçekliginiñ şartları, eñ adiy şekiller, doğru fikir etüviniñ usul ve printsipleri aqqında bir ilimdir.

Gregor Reisch, Margarita Philosophica, Typus Logice.jpg

Kündelik tilde mantıq, bir qaç fikirden netice çıqarmaq içün bir muakeme usulıdır.

Daa resmiy olaraq, mantıq, endi belli ve bar olğanlardan yañı iddialarnı doğurğan bir ceryanda - çıqarmada - toqtala.

Mantıq, aynı zamanda, ameliy asıl, muayyen tefekkür, miqdar hususiyetlerini ve etraftaki dünyanıñ parçalarını belgilemek qabiliyeti manasına kele. Bundan ğayrı, mantıq, insanlarğa sezgi olaraq menimsengen obrazlarnı añlamağa ve olarnı, başqa insanlar tarafından añlanğan tilde tasvirlemege yardım ete.

Adetince, mantıq, felsefeniñ bir saası olaraq incelene. On sekizinci asırnıñ ortasından başlap mantıq, riyaziyatnıñ, soñ zamanlarda ise informatikanıñ araştırma predmeti ola. İlim olaraq, mantıq, fikirler ve delillerniñ strukturasını araştıra ve sınıflaştıra, olarnıñ kodifikatsiyasınıñ shemalarnı azırlay. Demek ki, mantıqnıñ araştırma predmeti ihtimallik ve sebeplik aqqında fikirlerni kirsetip pek büyük ola bile.

Mantıq, em de mantıqiy nuqsanlarnıñ terkibini ve paradokslarnı tetqiq ete.

Eski Yunanlılar dialektikanı mantıqqa ve belâğatqa bölüngen. Belâğat, mantıqnıñ qarşı qoyması olaraq incelene bilgen ve inandırıcı delillerğa bağlıdır.