Jan-Jak Russo

Jan-Jak Russo (frenkçe Jean-Jacques Rousseau [ʒɑ̃ʒak ʁuso]; 1712 senesi kiraz aynıñ 28, Jeneva - 1778 senesi oraq aynıñ 2, Ermenonvil, Parisniñ yanında) - jenevadaki frenk-isviçre felsefeci-maarifçi, yazıcı, bestekâr.

Tercimeial

Jan-Jak Russo, 1712 senesi kiraz aynıñ 28 Jenevada saatçısınıñ qorantasında doğğan. O vaqıt Jeneva, mustaqil devlet-şeeri, kalvinizmniñ merkezi edi. Oğlançıqnıñ anası, doğuruvdan doquz kün soñra keçindi. Jan-Jak ve onıñ ağası Fransua, babası ve onıñ qız-qardaşı, Süzanna alasınen terbiyelene ediler.

Jan-Jak on yaşında olğanda, onıñ babası, ğayretli avcı, zengin topraq saibinen qaçaq avcılığında qabaatlanılğan edi. Ükümdan qaçınmaq içün Süzanna alasını alıp Nionğa köçken. Soñra ekinci sefer evlenip oğlunı pek qayğırmay edi. Jan-Jak, onı öz oğlusınen beraber Jeneva vilâyetindeki köyüne kalvinistik pastorına oquvga yollağan dayısınen qalğan. Pastordan oğlanlar, biraz riyaziyatnı ve ressamlıqnı ögrendiler. Diniy ibadeti, Russonı ep eyyecanlandıra edi ve bazı vaqıt içinde ruhaniy olması aqqında arzu ete edi.