Bağçasaray (şiir)

Bağçasaray — qırımtatar şairi Amdi Giraybaynıñ yazğan bir şiiri.

Şiirniñ metni

Bağçasaraylı Ayşe totayğa

Bağçasaray, Hansaray, dertli saray,
Küneş aqşam süzülip qavuşqanda,
Mezarından baş tiklep Geray qaray,
Kün saqlanıp, ay tuvıp avuşqanda.

Bağçasaray degende közlerime,
Cılay turğan bir öksüz qız körüne.
Qulaq sal, ey, tuvğanım, sözlerime,
Hansaraynıñ köz taşla bir törüne.

Kâbesidir tatarnıñ Bağçasaray,
Bugün halqnıñ közünde hor bolsa da,
Tatar kene qıbla dep oña qaray,
Bağçasaray bağında gül solsa da.

Bağçasaray deseler köz torlana,
Göñlüm coşa, muğayıp qalbim cılay,
İçke aqa közyaşlar, can horlana.
Bağçasaray, yıqıldıñ niçün bulay?

Medresesi, mektebi, çardaqları,
Birer tenbel yuvası – qave bolğan,
Öz toprağı, çay içken bardaqları,
Qavelerge tatarlar qoyday tolğan.

Bağçasaray, yuqlama, baar keldi,
Küneş tuvdı, dünyanı yarıqlattı.
Kesertkiler, yılanlar talıp öldi,
Seniñ sabrıñ duşmannı ayıqlattı.

Bağçasaray, bağçalar, bağçası bol,
Bülbülleriñ сırlasın, cırlasınlar.
Sen tatarnıñ öz küçü aqçası bol,
Çeçekleriñ Qırımnı sırlasınlar.

Menbalar

Amdi Giraybaynıñ şeerleri
Багъчасарай Амди Гирайбай — Elmar bey Ablayevniñ oquvı